أخبار ليبيااخبار طرابلس

طرابلس.. رمانة الميزان

لما نحكوا على طرابلس يعني نحكوا ع الناس اللي فيها.. نحكوا عن حبها للحياة وعن كيف ادافع عن هالحب.

طرابلس القهاوي، السهريات، والمالوف وكل شي حلو .. التنوع والثقافة والاختلاف اللي مايفسد للود قضية.

طرابلس البحر والشط الباهي والكرنيش السمح والناس اللي لما تشوفهم .. تشوف البسمة والبصارة والضحك حتى في أصعب الأوقات.

طرابلس بوسليم قرقارش سوق الجمعة الشط الهاني.. غوط الشعال وشارع المدار.. طرابلس حسن عريبي وسلام قدري ونجيب الهوش وبنور وبن نعسان.

طرابلس طريق السكة والمقريف.. عمر المختار وجامع مراد آغا. طرابلس الموسيقى والفن والمسرح طرابلس جمال الدين الميلادي ومحمد شرف الدين والشيخ قنيص.

طرابلس الغنوة واللحن والكلمات اللي ديما ممتزجة مع بعضها وديما تكون هي العنوان.

طرابلس الحاج فتحي وبريوشه وانفاص التن من عمي رمضان عيوني وكباب راس حسن.

طرابلس البيضاء.. أم السرايا والغزالة المنهوبة اللي عاشت سنين مع الرومان والإسبان والوندال والعثمانيين والطليان والقذافي وفجر ليبيا الإسلاميين.. وكانت صبارة وتحملت وما شكتش .. تحمّلت وكتمت في نفسها ومشوا كلهم وقعدت هي.

وعلى قد ما نحكوا عليها ما نقدروش نوصفوا حلاوتها وزينها لأنها هي الحلوة والزينة كيف لا وهي عروس البحر .. عمركم سمعتوا بعروس بحر شينة؟

الوسوم

مقالات ذات صلة

زر الذهاب إلى الأعلى
إغلاق